Гэр хорооллыг хөгжүүлэх сангаас таван иргэн дэмжлэг авлаа
2017-09-29, 02:39 PM

Улаанбаатар хотын агаарын бохирдлыг бууруулах хамгийн үр дүнтэй шийдэл  нь гэр хорооллыг орон сууцжуулах гэж хотын удирдлагууд үзэж байгаа билээ. Энэ ч үүднээс Нийслэлийн Засаг дарга бөгөөд Улаанбаатар хотын Захирагч С.Батболд “Гэр хорооллыг хөгжүүлэх сан”-г санаачлан байгуулсан юм. Энэхүү сангийн зорилго нь Улаанбаатар хотын агаарын чанарыг сайжруулах 1, 2 дугаар бүсийн оршин суугчид орон сууцны ипотекийн зээлийн урьдчилгаа 30 хувийн төлбөрөө “Гэр хорооллыг хөгжүүлэх сан”-гаас төлүүлэн, тохилог орон сууцаар хангагдах явдал юм.

“Гэр хорооллыг хөгжүүлэх сан”-гаас анхны дэмжлэгийг 2017 оны 7 дугаар сард Чингэлтэй дүүргийн 16 дугаар хорооны иргэн Н.Одончимэг авч орон сууцандаа орж байсан бол дахин дөрвөн иргэн Гэр хорооллыг хөгжүүлэх сангийн шаардлагыг хангаж орон сууцны түлхүүрээ хотын даргаас өнөөдөр гардан авлаа. 

Нийслэлийн Баянзүрх дүүргийн иргэн Б.Батбаяр, Д.Уянга, Б.Шинэбаяр, Сонгинохайрхан дүүргийн иргэн Ж.Төрбаяжих нар ипотекийн зээлийн сар бүр төлөх төлбөрийг төлөх боломжтой, байнгын орлоготой ажил, хөдөлмөр эрхэлдэг боловч урьдчилгаа 30 хувийн хуримтлал бий болгох боломж байдаггүй байснаа учирлаж, Гэр хорооллыг хөгжүүлэх сан нэг талаас иргэдээ бодсон, нөгөө талаас барилгын салбараа дэмжсэн, нүдээ олсон хөтөлбөр болсныг хотын даргад хэлж байлаа.

Тухайлбал, Баянзүрх дүүргийн 23 дугаар хорооны иргэн Д.Уянга хэлэхдээ “Би өмнө нь орон сууц худалдан авахаар их хөөцөлдсөн. Гэвч урьдчилгаа 30 хувиа бүрдүүлж чадаагүй учраас авч чадаагүй. Харин хотын даргын санаачилсан “Гэр хорооллыг хөгжүүлэх сан”-д хамрагдаад 57 метр квадрат байрны төлбөрийн 30 хувийн дэмжлэг авч, өнөөдөр түлхүүрээ авлаа. Маш их баяртай байна. Нийслэлийн Засаг дарга болон удирдлагуудад баярласнаа илэрхийлье.” хэмээлээ.

Нийслэлийн удирдлагын зүгээс агаарын бохирдолтой тэмцэх олон арга хэмжээ авч хэрэгжүүлж байгаагийн нэг нь энэхүү сан бөгөөд үүгээр дамжуулан зах зээл дээр борлуулагдаагүй 15,000 орон сууцыг эргэлтэд оруулах, иргэдээ хамгийн таатай нөхцөлөөр орон сууцанд хамруулахыг зорин ажиллаж байгаагаа хотын дарга хэлээд, Энэхүү сангийн үйл ажиллагааг дэмжин хамтран ажиллаж байгаа арилжааны банкнуудад мөн талархаж байгаагаа илэрхийллээ.

Гэр хорооллын хөгжүүлэх сангийн үйл ажиллагаагаа цаашид тогтмол үргэлжлэх бөгөөд хамрагдах хүсэлтэй иргэдийн материалыг Нийслэлийн гэр хорооллын дэд бүтцийн газар хүлээн авч байгаа юм байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сэтгэгдэл
Анхааруулга !!!
Уншигчдын бичсэн сэтгэгдэлд www.chingis.mn хариуцлага хүлээхгүй болно.
ХХЗХ-ны журмын дагуу сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Сэтгэгдэлтэй холбоотой санал гомдолыг 7000-1924 утсаар хүлээн авна.